⛰️ 2.504m
〽️ Euskaldunen mendi sakratua
📍 ZONALDEA: Larra-Belagua (Isaba, Nafarroa)
🧭 IBILBIDEA: Pierre Saint Martin – Auñamendi – Añelarra – Arlas
⏱️ IRAUPENA: 6h (joan etorria)
🟠 ZAILTASUNA: Mendi ibilaldi zorrotza ⛰️⚡ (T3)
📮 POSTONTZIA: ✅
⭐ INTERES MENDIZALEA: Ezinbestekoa
Auñamendi edo Pic d ‘Anie euskaldunen mendi sakratua da. Nahiz eta Euskal Herriko muga “ofizialen” barruan ez egon, Nafarroako mugatik kilometro batera baino gutxiagora dago eta bere izena Euskaratik jasotzen du. Horregatik, batzuek, sentimentalki behintzat, Euskal Herriko sabaiatzat hartzen dute, altitudean sabai ofiziala, Hiru Erregeen Mahaia (2.446m), gainditzen baitu.
Pirinioetako Larra paisaiaren gainean dagoen Auñamendiko gailurra harro ikusita, ez da harritzekoa leku sakratua izatea euskal mitologian: ekaitz-egilea den Yanagorriren edo bere zilarrezko jauregian altueratan bizi zen Maithagarriren etxea. Bi jainkosak Mari jainkosa ospetsuari, euskal mitologiako jainkosa nagusiari, erreferentzia egiteko modu ezberdinak dira.
Auñamendi mendia ere oso garrantzitsua da ikuspegi geografiko batetik; izan ere, 2.500 metroko altuera gainditzen duen lehen Pirinioetako tontorra da ozeanotik, benetan goi-mendiaren sentsazioa ematen duen lehena. Horretaz guztiaz gain, Larrako Karst erdian kokatua dago, kareharrizko masa eskerga bat, 2.000 metrotik gorakoa dena eta goialdean nahiko laua dena, garrantzi handiko multzo karstiko bat sortuz. Goiko aldea lapiaz handi bat da, irregularra eta hautsia, eta bertan uraren ekintzak leize sakonak ireki ditu, lekua benetako parke espeleologiko bihurtzen dutenak. Hemen daude munduko leizerik sakonenetako batzuk (San Martingo leizea edo Illaminako Ateen leizea, esaterako), baina guztira 3.000 leize daude katalogatuta eta galeria sarea izugarria da, 125 km baino gehiagokoa guztira.
Ikus daitekeenez, mendizale ikuspegi batetik ezinbestean igo beharreko mendia da Auñamendi.
Leave a Reply